Starfsmaður í upplýsingamiðstöð ferðamanna veitir upplýsingar um samgöngur, áhugaverða staði, gistingu og tengda þjónustu og starfsemi. Vinnan felst í að deila út kortum og bæklingum með upplýsingum fyrir ferðafólk og hjálpa til við bókanir á ferðum, gistingu og viðburðum. Verkefni geta verið mismunandi milli skrifstofa en algengast er að veita upplýsingar í þeim tilgangi að dvöl ferðamanna verði sem ánægjulegust.
Starfsmaður í upplýsingaþjónustu þarf að búa yfir ríkri þjónustulund, eiga gott með að hlusta, setja sig í spor annara og veita aðstoð. Mikilvægt er að geta leitað eftir upplýsingum á tölvutæku formi og unnið undir nokkru álagi. Upplýsingagjöf fer yfirleitt fram á erlendum tungumálum þannig að auk enskukunnáttu er öll önnur tungumálaþekking gagnleg.
Þá er æskilegt að fylgjast með stöðu, breytingum og nýjungum innan ferðaþjónustunnar og geta myndað tengslanet við fólk innan hennar s.s. eigendur gistihúsa, hótel og ferðaskrifstofur.
Ekki er gerð formleg krafa um menntun í starfinu en ýmis starfstengd námskeið kunna að vera í boði.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
