Hestasveinar sinna margvíslegum störfum tengdum hirðingu hesta og aðstoða við þjálfun þeirra. Starfið felst einnig í aðstoð við viðskiptavini í hestaferðum hjá ferðaþjónustufyrirtækjum og að leiðbeina um grunnþætti hestamennsku.
Í starfi hestasveins gætirðu unnið á hestabúgarði, við hestatengda ferðaþjónustu eða hjá fyrirtækjum í sambærilegri starfsemi svo sem á tamningastöðvum eða hestaleigum.
Hestasveinn þarf að geta sinnt grunnþáttum við hirðingu og aðbúnað hesta, geta metið heilsufarslegt ástand þeirra og þekkja helstu aðferðir við þjálfun. Mikilvægt er að hafa grunnfærni í reiðmennsku og geta farið með byrjendur í styttri reiðtúra. Hestasveinn þarf að þekkja helstu öryggisatriði sem snúa að hestamennsku og geta brugðist við algengustu óhöppum.
Námsbrautir í hestamennsku við Fjölbrautaskóla Suðurlands og Fjölbrautaskóla Norðurlands vestra miða að því að undirbúa nemendur annars vegar fyrir störf á hestaleigum og í hestaferðum, og hins vegar sem aðstoðarmenn við tamningar. Hestakjörsvið er einnig í boði á opinni stúdentsbraut Framhaldsskólans í Mosfellsbæ.
Þá er við Háskólann á Hólum í boði þriggja ára háskólanám til BS-gráðu, annars vegar í reiðmennsku og reiðkennslu, og hins vegar í hestafræðum. Unnt er að taka hluta námsins og útskrifast með diplóma gráðu. Nám í hestafræði til BS – gráðu er einnig að finna við Landbúnaðarháskóla Íslands.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
