Meindýraeyðar nota mismunandi aðferðir við að eyða meindýrum og skaðvöldum á borð við geitungabú, rottur, mýs og silfurskottur. Unnið er víða, svo sem í görðum, byggingum og holræsum og eru mismunandi efni, gas og gildrur notaðar í starfinu.
Margir meindýraeyðar vinna sjálfstætt en einnig hjá hinu opinbera eða einkaaðilum.
Meindýraeyðir þarf að búa yfir þjónustulund og hæfni til að leysa vandamál. Mikilvægt er að þekkja lög og reglur um örugga varnarefnanotkun. Þá er áhugi á dýrum og náttúru talsverður kostur. Nauðsynlegt er að hafa öll tilskilin leyfi í fullu gildi.
Ljúka þarf sérstöku námskeiði við Endurmenntun Landbúnaðarháskóla Íslands til að geta sótt um leyfi til meindýraeyðingar. Að afloknu námskeiði er sótt um starfsleyfi til Umhverfisstofnunar.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
