Jeppaleiðsögn

STARF

Jeppaleiðsögumaður ekur ferðafólki um landið, gjarna hálendi og jökla, og veitir samtímis leiðsögn. Í starfinu er fjallað um það sem fyrir augu ber; náttúru, lífríki og áhugaverða staði ásamt því að leiðbeina um þá afþreyingu og þjónustu sem í boði er hverju sinni. Farartækin, jeppar eða smárútur, eru oft breytt og sérútbúin til þess að fara leiðir utan hefðbundinna ferðamannaleiða, gjarnan fáfarna fjallvegi.

Í starfi sem jeppaleiðsögumaður gætirðu til dæmis unnið fyrir ferðaskrifstofur, ferðaheildsala eða afþreyingarfyrirtæki. Jeppaleiðsögumenn vinna með landvörðum, skálavörðum og starfsfólki á ferðaskrifstofum og gististöðum og gæta þess að náttúru- og menningarminjar verði ekki fyrir skemmdum af völdum ferðafólks.

Helstu verkefni

taka á móti ferðafólki fyrir hönd ferðaskrifstofu eða skipuleggjanda
útfæra skipulagðar ferðir um landið, hálendið og jökla, við sumar og vetraraðstæður
aðstoða og miðla upplýsingum um klæðnað, veðurútlit o.þ.h.
fylgjast með upplýsingum um veður og færð
hafa eftirlit með og undirbúa farartæki fyrir ferðir
minniháttar viðgerðir ef farartæki bilar
tryggja öryggi ferðafólks og bregðast við óvæntum aðstæðum

Hæfnikröfur

Jeppaleiðsögumaður þarf að hafa aukin ökuréttindi. Mikilvægt er að kunna leiðsögutækni, geta stjórnað hópi, brugðist við slysum og hafa grunnþekkingu í skyndihjálp. Einnig þarf að geta brugðist við íslenskum vetraraðstæðum og hafa fengið undirstöðuþjálfun í fjallamennsku. Æskilegt er að þekkja vel til sögu og menningar landsins, helstu ferðamannaleiðir, staði, söfn og stofnanir á hverju landsvæði og geta leiðbeint ferðafólki á erlendu tungumáli. Auk þess þarf jeppaleiðsögumaður að þekkja farartækið, geta sinnt nauðsynlegum viðgerðum og brugðist við óvæntum aðstæðum svo sem í ám, vötnum eða á jöklum.

Hæfnisetur ferðaþjónustunnar