Bifvélavirkjar starfa við viðgerðir, viðhald og endurbætur á bílum og ökutækjum. Oft er um að ræða sérhæfingu í ákveðnum bifreiðategundum eða vélarhlutum en bifvélavirkjar vinna gjarnan við gangverk bílsins; gírkassa, vél, bremsur, stýri, eða rafbúnað. Bifvélavirkjun er löggilt iðngrein.
Bifvélavirkjar starfa flestir á bifreiðaverkstæðum en einnig við eftirlit hjá fyrirtækjum og skoðunarstöðvum og í verslunum sem selja ökutæki eða varahluti.
Sem bifvélavirki þarftu að geta unnið sjálfstætt og skipulega við að meta, greina og lagfæra algengustu bilanir í bílum. Mikilvægt er að þekkja til laga og reglugerða í umferðarmálum og geta ráðlagt viðskiptavinum út frá þörfum þeirra og óskum meðal annars hvað varðar kostnað og verktíma. Í starfi bifvélavirkja eru sérhæfð tölvustýrð tæki mikið notuð við vinnuna.
Bifvélavirkjun er kennd við Borgarholtsskóla og Verkmenntaskólann á Akureyri. Þá var námið um tíma í boði við Fjölbrautaskóla Norðurlands vestra.Tveggja anna grunndeildir í málmsmíðum og véltækni má að auki finna víða. Nám bifvélavirkja tekur um þrjú og hálft ár.
Raunfærnimat hefur farið fram og/eða kann að vera í boði.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
