Störf flugfreyja og flugþjóna felast fyrst og fremst í að gæta öryggis flugfarþega og áhafnar; kynna öryggisútbúnað um borð og sjá til að öryggisreglum sé fylgt, ekki síst í flugtaki og lendingu. Um er að ræða vaktavinnu þar sem vinnutíminn getur verið mjög óreglulegur.
Verkstjóri áhafnar um borð kallast fyrsta flugfreyja og ber ábyrgð á að unnið sé samkvæmt reglum og gerir skýrslu um hverja ferð. Yfirflugfreyja er yfirmaður flugfreyja og flugþjóna og sér að hluta til um þjálfun þeirra og er tengiliður við stjórnendur flugfélaga.