Starf vöruþróunarstjóra snýr að þróun á vörum og þjónustu eftir ákveðnum verkferlum og stefnu viðkomandi fyrirtækis. Vöruþróunarstjóri vinnur þvert á deildir, ber ábyrgð á og stýrir teymisvinnu þar sem verkefni eru mótuð og áhættugreind áður en þau fara í framkvæmd og árangur þeirra að lokum metinn.
Áætlanagerð fer fram í samstarfi við yfirstjórn viðkomandi fyrirtækis en einnig snýst starfið mikið um samskipti við birgja og ýmsa samstarfs- og hagsmunaaðila.
Í starfi vöruþróunarstjóra er afar mikilvægt að þekkja markaðinn og sviðið sem starfað er á auk góðrar yfirsýnar yfir verkefnastöðu hverju sinni. Mikilvægt er að geta fylgt skilgreindum ferlum, tímaskipulagi verkefna og unnið sjálfstætt.
Ýmiss konar nám á háskólastigi getur verið góður undirbúningur svo sem tengt nýsköpun og viðskiptaþróun (HÍ), nýsköpun og frumkvöðlafræði (HR), vöruhönnun (LHI) eða iðnmeistararéttindi svo dæmi séu tekin.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
