Störf almannatengla felast í greiningu úrlausnarefna og sóknarfæra, stefnumótun, ráðgjöf og margvíslegum samskiptum í tengslum við orðspor og upplýsingamiðlun fyrirtækja, samtaka eða opinberra stofnana.
Í starfi sem almannatengill getur þú ýmist unnið sjálfstætt eða á sérstökum almannatengslastofum, hjá einstökum fyrirtækjum, félögum eða stofnunum.
Almannatenglar þurfa að eiga gott með mannleg samskipti, kunna vel að koma fyrir sig orði, vera hvetjandi og lausnamiðaðir. Skipulags- og stjórnunarhæfileikar eru mikilvægir ásamt því að geta unnið sjálfstætt, gert áætlanir og metið árangur. Tölvu- og tungumálaþekking er einnig mjög æskileg.
Menntun á sviði almanntengsla og markaðsfræða er algeng á meðal fólks sem starfar við almannatengsl en önnur menntun getur einnig komið sér vel, svo sem á sviði kennslu- og fjölmiðlafræða. Háskólinn á Bifröst hefur boðið upp á nám í miðlun og almennatengslum til BA – gráðu.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
