Ljósamaður vinnur að uppsetningu ljósa og daglegum rekstri þeirra. Í starfinu felst að stýra kösturum, til dæmis eltiljósum, og/eða stýra ljósaborði á margs konar viðburðum.
Ljósamenn vinna í samstarfi við ljósameistara, ljósahönnuði og sýningarstjóra. Oft er um að ræða vaktavinnu og er mikil viðvera í kringum viðburði á borð við leiksýningar.
Ljósamaður þarf að hafa áhuga á tækni og rafmagni. Mikilvægt er að geta unnið í teymi með öðrum. Ljósamenn vinna með ljóskastara af ýmsum stærðum og gerðum, tölvur og ljósaborð og getur vinnan á köflum reynt á líkamlega.
Ekki er krafist sérstakrar menntunar í starfi ljósamanns en ýmis starfstengd námskeið kunna að vera í boði. Einnig má benda á nám í rafvirkjun en grunn- og framhaldsnám í rafiðngreinum má finna við marga framhaldsskóla.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
