Búningahönnuður

STARF

Hönnun og handverk| Listir og afþreying| Tíska og útlit

Búningahönnuðir ákveða heildarútlit sýningar í samstarfi við leikstjóra og aðra listræna stjórnendur og hanna búninga í samræmi við það. Í starfinu felst að teikna búninga eða setja upp á annan myndrænan hátt ásamt því að velja efni og liti sem henta heildarútliti og notkun búninga hverju sinni.

Sem búningahönnuður gætirðu til dæmis unnið í stórum sem smáum leikhúsum, í sjónvarpi eða sem verktaki við kvikmyndagerð.

Helstu verkefni

greina handrit, teikna búninga og taka þátt í undirbúningi sýningar eða verkefnis
ákveða útlit sýningar í samráði við leikstjóra og leikmyndahönnuð
lesa handrit og vinna heimildavinnu, til dæmis í sambandi við ákveðið tímabil
velja efni, liti, áferð og snið búninga
huga að förðun og hári og samræmi þess, búnings og heildarútlits leikmyndar
meta hvernig búa á til einstaka hluti búninganna í sýningum
vinna að úrlausnum ýmissa vandamála er varða búninga og koma upp á æfingatímum
koma hönnun í framkvæmd til búningagerðarfólks á verkstæði

Hæfnikröfur

Búningahönnuðir þurfa að hafa gott hugmyndaflug og geta teiknað upp eigin hugmyndir. Mikilvægt er að skilja sniðagerð, hafa áhuga á hönnun og sögu auk þess að þekkja til þess hvernig spila má saman efni, litum og áferð. Skipulagshæfileikar og geta til að vinna með öðrum eru einnig nauðsynlegir eiginleikar. Búningahönnuðir vinna mikið með pappír og teikniáhöld auk tölvuvinnu.

Bandalag íslenskra listamanna

Námið

Búningagerð er ekki kennd sérstaklega á Íslandi. Fatahönnunarbraut er hins vegar við Listaháskóla Íslands en um er að ræða þriggja ára nám til BA – gráðu.

Þá eru tengdar greinar á borð við hönnun og nýsköpun, fatatækni, kjólsaum og klæðskurð kenndar við Tækniskólann auk fata- og textílkjörsviðs listnámsbrauta nokkurra framhaldsskóla.