Förðunarmeistarar sjá um hárgreiðslu og förðun auk þess að búa til ýmis konar gervi, svo sem hárkollur, gervinef, bólur og skalla. Í starfinu felst að skapa ákveðið heildarútlit, hvort heldur sem er, að gera fólk sem eðlilegast fyrir sjónvarpsútsendingu eða nota hárkollur og gervi í kvikmyndum.
Í starfi förðunarmeistara gætirðu unnið víða svo sem í tengslum við sjónvarp, leikhús, tónleikahald, myndatökur, kvikmyndagerð eða tískusýningar. Gjarnan er unnið í samstarfi við förðunarfólk, búningahönnuði, skriftur, tökumenn, hljóðmenn, ljósamenn, leikara og leikstjóra.