Fasteignasalar starfa alla jafna á fasteignasölum og annast þar ráðgjöf vegna fasteignaviðskipta. Í starfinu felst að leita eftir tilboðum, útbúa kaupsamninga, ganga frá afsali og sjá um önnur gögn fyrir viðskiptavini. Fasteignasali er löggilt starfsheiti.
Löggiltir fasteignasalar þurfa að ljúka nokkuð viðamiklu námi og fá löggildingu frá dómsmálaráðuneyti.
Í starfi sem fasteignasali er mikilvægt að þekkja vel til lagaumhverfis í fasteignaviðskiptum og samnings- og skjalagerðar. Góð samskiptafærni er mikill kostur sem og að sýna ábyrgð og geta unnið undir álagi. Gott tímaskipulag og tölvukunnátta eru einnig mikilvægir kostir í starfi fasteignasala.
Nám til löggildingar fasteigna-, fyrirtækja- og skipasala er námsbraut sem boðið hefur verið upp á við Endurmenntunardeild Háskóla Íslands. Námið undirbýr þá sem vilja starfa við sölu fasteigna, fyrirtækja og skipa. Hvort tveggja er hægt að stunda námið í staðnámi og fjarnámi.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
