Sálfræðinám til starfsréttinda er grunn- og framhaldsnám á háskólastigi. Í grunnnáminu er inngangur að helstu sviðum sálfræðinnar líkt og lífeðlislegri og hugrænni sálfræði, þroska- og félagssálfræði og áhersla lögð á rannsóknaraðferðir. Í framhaldsnáminu eru nemendur í verklegri þjálfun og geta sérhæft sig frekar á ýmsum sviðum sálfræðinnar.
Námstími til BS/BSc prófs er þrjú ár og tvö ár til Cand.psych./MSc í klínískri sálfræði.
Nám í sálfræði (BS/Cand.psych.) fer fram í sálfræðideild við heilbrigðisvísindasvið Háskóla Íslands.
Nám í sálfræði (BSc/MSc) fer fram innan viðskiptadeildar Háskólans í Reykjavík.
Einnig er hægt að fara í grunnnám í sálfræði (BA próf) við félagsvísindadeild Háskólans á Akureyri.
Sjá nánar um inntökuskilyrði við Háskóla Íslands og Háskólann í Reykjavík.
Námið er lánshæft til framfærslu og skólagjalda hjá Menntasjóði námsmanna. Fag- og stéttarfélög veita oft styrki til náms. Fáðu frekari upplýsingar hjá þínu félagi.
Nám í sálfræði er fræðilegt og starfstengt. Í boði eru skyldu- og valnámskeið í staðbundnu námi.
Grunn- og framhaldsnámið veitir réttindi til að sækja um leyfi til að starfa sem sálfræðingur. Leyfið er hins vegar ekki veitt nema að undangenginni 12 mánaða verklegri þjálfun undir leiðsögn sálfræðings að loknu framhaldsnámi.
Eins er margvíslegt framhaldsnám í boði við deildir skólanna sem fólk getur sótt um að loknu grunnnámi ef það hyggur ekki á að starfa sem sálfræðingar.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
