Námi í efnafræði á háskólastigi er ætlað að veita sterka undirstöðu á helstu sviðum þar sem verið er að rannsaka uppbyggingu, samsetningu og eiginleika efna. Meginsviðin eru lífræn og ólífræn efnafræði, eðlisefnafræði, reikniefnafræði og efnagreiningar.
Nám í efnafræði er kennt innan Raunvísindadeildardeildar Háskóla Íslands, hvort tveggja nám til BS prófs sem og framhaldsnám til MS gráðu.
Inntökuskilyrði eru stúdentspróf eða sambærilegt nám með ákveðnum lágmarksfjölda eininga í stærðfræði og raungreinum.
Námið er lánshæft til framfærslu og skólagjalda hjá Menntasjóði námsmanna. Fræðslusjóðir stéttarfélaga veita oft styrki til náms. Fáðu frekari upplýsingar hjá þínu félagi.
Fyrsta árið er áhersla lögð á undirstöðu-raunvísindagreinar; almenna efnafræði, eðlisfræði og stærðfræði. Á öðru námsári er hægt að velja á milli námskeiða sem gera mismiklar kröfur til stærðfræðikunnáttu en þriðja árið samanstendur mestmegnis af valnámskeiðum.
Námið er hvort tveggja fræðilegt raungreinanám en einnig er um að ræða starfsþjálfun í verklagi við störf á rannsóknarstofu.
Efnafræðingar starfa víða í samfélaginu, meðal annars við rannsóknir, þróun og framleiðslu hjá nýsköpunarfyrirtækjum auk kennslu á öllum skólastigum.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
