Vínþjónn sérhæfir sig í framreiðslu á víni og pörun víns og matar. Vínþjónar þekkja vel til jafnt léttra og sterkra vína og hvaða vín passa með hverjum rétti. „Sommelier“ er alþjóðlegt heiti yfir vínþjón.
Vínþjónar vinna gjarna á fínni veitingastöðum, hótelum og börum. Víða erlendis starfa vínþjónar einnig í tengslum við innflutning á víni sem og við greinaskrif um vín í blöðum og tímaritum.
Vínþjónn þarf að búa yfir viðamikilli þekkingu á víni, vínframreiðslu og pörun víns og matar. Nauðsynlegt er að búa yfir þjónustuhæfileikum, góðri samskiptatækni og geta unnið undir álagi.
Vínþjónn er ekki lögverndað starfsheiti á Íslandi en fjöldi skóla erlendis og alþjóðlegra samtaka sinna fræðslu og þjálfun fyrir vínþjóna. Þá er nám í framreiðslu í boði við Menntaskólann í Kópavogi.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
