Starfsmaður við umönnun á hjúkrunarheimili aðstoðar við fjölbreyttar athafnir daglegs lífs til að hámarka lífsgæði íbúanna, viðhalda sjálfstæði þeirra og vellíðan. Meginhlutverk starfsins er þrenns konar; aðhlynning, samskipti og heimilisstörf, gjarnan í miklum tengslum við íbúa, aðstandendur og samstarfsfólk.
Á hjúkrunarheimilum er unnin vaktavinna undir leiðsögn deildarstjóra eða hjúkrunarfræðings.
Í umönnunarstarfi á hjúkrunarheimili er nauðsynlegt að halda fullri athygli og sýna aðgæslu í öllum þáttum starfsins. Unnið er eftir ákveðnum verklags- og öryggisreglum en einnig þarf að geta lagað sig að breytilegum þörfum íbúa og unnið með umhyggju og virðingu að leiðarljósi.
Starfsmaður á hjúkrunarheimili þarf að gæta trúnaðar og skrifa undir ákvæði um þagnarskyldu.
Ekki er gerð formleg krafa um menntun til starfa við umönnun á hjúkrunarheimilum en ýmis konar starfstengd námskeið kunna að vera í boði.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
