Tækniteiknari vinnur við teikningar og uppdrætti ásamt hönnunarvinnu, framsetningu og útgáfu teikninga. Unnið er eftir vinnuteikningum, loftmyndum eða fyrirmælum frá hönnuðum og felst vinnan meðal annars í grunnteikningu og teikningum af húsum, innréttingum, landslagi, skipulagi eða vélum. Verkefnin eru alla jafna unnin í tvívíðum eða þrívíðum teikniforritum.
Í starfi sem tækniteiknari gætirðu til dæmis unnið á teiknistofu arkitekta, verkfræðistofu, með landslagsarkitektum eða hjá ríki og bæ.
Í starfi tækniteiknara er vandvirkni mikill kostur en auk þess er mikilvægt að hafa skipulag á hlutunum við grafíska framsetningu teikninga og gagna. Tækniteiknari vinnur mikið við tölvu og þarf að hafa góð tök á hugbúnaði sem tengist framsetningu og útgáfu teikninga.
Tækniteiknari þarf að þekkja til einfaldrar myndvinnslu og hluta á borð við teiknigrunna, teikningaskrár, teikninganúmerakerfi og höfundarétt.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
