Sölustjórar skipuleggja og stjórna sölustarfsemi í framleiðslu-, innflutnings-, dreifingar- og þjónustufyrirtækjum. Í starfinu felst að stjórna daglegri starfsemi ásamt því að skipuleggja og samræma störf sölumanna.
Í starfi sem sölustjóri gætirðu til dæmis unnið í heildsölu, innflutnings-, útflutnings- eða dreifingarfyrirtæki eða við auglýsinga- eða fasteignasölu.
Sölustjóri þarf að vera fær í mannlegum samskiptum og samningaviðræðum. Mikilvægt er að þekkja til rekstrar fyrirtækja og hafa getu til að stjórna sölu og viðskiptum. Einnig eru skipulagshæfileikar nauðsynlegir ásamt því að geta unnið í teymi og stýrt vinnu annarra. Kunnátta í ritvinnslu og töflureiknum er æskileg enda talsvert um skýrslu- og fjárhagsáætlanagerð. Í starfinu getur verið nokkuð um ferðalög og kvöld- og helgarvinnu.
Ekki er krafist ákveðinnar menntunar í starfi sölustjóra en ýmis konar nám á sviði viðskipta, verslunar og þjónustu getur nýst í starfinu.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
