Skólaritarar starfa á skrifstofum skóla og sinna þar daglegri afgreiðslu, símsvörun, skjalavörslu og bókhaldi. Í starfinu felst einnig að afgreiða ýmis erindi nemenda og eiga samskipti við fólk og stofnanir tengdum skólanum.
Í starfi skólaritara eru mikil samskipti við nemendur og starfsfólk auk þeirrar tengingar sem starfið felur í sér, á milli heimilis og skóla.
Í starfi skólaritara er oft krafist stúdentsprófs, sérstaklega ef hluti starfsins felst í skjalavörslu og bókhaldi. Áhersla er lögð á hæfni í mannlegum samskiptum og mikilvægi þess að gæta trúnaðar varðandi upplýsingar. Mikilvægt er að þekkja vel til þeirra upplýsinga- og skráningarkerfa sem notuð eru í starfinu.
Ýmis konar nám getur verið gagnlegt í starfi skólaritara en einnig hafa sérstök námskeið verið í boði á vegum símenntunarmiðstöðva.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
