Pípulagningamenn leggja og tengja hita-, neysluvatns- og frárennsliskerfi. Í starfinu felst einnig að setja upp ýmis konar sérhæfð lagnakerfi og sjá um viðhald og endurnýjun slíkra kerfa. Pípulagnir er lögvernduð iðngrein.
Í starfi pípara gætirðu starfað hjá pípulagningameisturum, í orkufyrirtækjum, veitustofnunum eða við faglega ráðgjöf í tengslum við fagið. Pípulagningamenn vinna oft með hönnuðum lagnakerfa og öðrum iðnaðarmönnum.
Pípulagningamaður þarf að vera fær um að hanna og leggja hita-, vatns- og frárennsliskerfi, teikna upp deililausnir og frágang og annast viðhald og viðgerðir.
Í starfi pípulagningamanns eru notuð ýmis verkfæri og vélar sem mikilvægt er að þekkja, svo sem rörtangir, lyklar, sagir, snitt-, bor-, brot- og höggvélar. Einnig eru notuð rör af ýmsum stærðum og gerðum ásamt tengibúnaði og einangrunar- og þéttiefnum.
Pípulagnir eru kenndar við Tækniskólann, Borgarholtsskóla og Verkmenntaskólann á Akureyri. Meðalnámstími er fjögur ár, þrjár til fjórar annir í skóla auk starfsþjálfunar.
Raunfærnimat hefur farið fram og/eða kann að vera í boði.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
