Ljósmæður starfa við meðgöngueftirlit, fæðingarhjálp, umönnun og foreldrafræðslu. Í starfinu felst fræðsla á meðgöngu, undirbúningur fyrir foreldrahlutverkið, heilbrigðisfræðsla ásamt umönnun nýbura og ungbarna. Ljósmæður eru löggilt heilbrigðisstétt.
Ljósmæður starfa víða, meðal annars í heimahúsum, á sjúkrahúsum og heilsugæslustöðvum.
Ljósmæður fá starfsleyfi frá landlækni og þurfa að hafa lokið B.S.-gráðu í hjúkrunarfræði auk kandídatsnáms í ljósmóðurfræði. Viðbótarskilyrði eru fyrir sérfræðileyfi á klínískum sérsviðum.
Ljósmóðir þarf að þekkja vel þau lög og reglugerðir sem gilda um heilbrigðisstarfsmenn og geta borið ábyrgð á störfum sínum við forvarnir, ráðgjöf, ljósmóðurfræðilega greiningu og meðferð. Í starfi ljósmóður er mikilvægt að þekkja siðareglur stéttarinnar, virða faglegar takmarkanir og þagnarskyldu þegar við á.
Ljósmóðurfræði til starfsréttinda er tveggja ára háskólanám á meistarastigi að loknu BS-námi í hjúkrunarfræði.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
