Leikmyndasmiðir smíða leikmyndir byggðar á vinnuteikningum leikmyndahönnuða. Starfið byggist mikið á því að í flestum tilvikum er ekki verið að smíða hluti til alvöru notkunar heldur sem hluta leikmyndar og leikverks. Mikið er unnið úr tré en einnig smíðað úr efnum á borð við plast, pappa og járn.
Leikmyndasmiður getur unnið í leikhúsum, við sjónvarps- eða kvikmyndagerð.
Leikmyndasmiðir þurfa að geta lesið úr vinnuteikningum og hafa gott almennt verkvit. Æskilegt er að geta hugsað í lausnum og sýnt þolinmæði við vinnuna. Leikmyndasmiður notar margskonar tæki og tól til smíða á borð við hamar, borvél og fræsara.
Ekki er sérstakt nám í boði fyrir leikmyndasmiði. Trésmíði- og/eða önnur tæknimenntun er hins vegar góður grunnur í starfinu en grunnnám bygginga- og mannvirkjagreina er kennt víða í framhaldsskólum auk sérnáms í húsasmíði og húsgagnasmíði.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
