Húsgagnabólstrarar vinna við að bólstra og klæða ný eða notuð húsgögn auk þess að sinna klæðningum og viðgerðum á innréttingum bíla eða annarra farartækja. Húsgagnabólstrun er löggilt iðngrein.
Í starfi sem húsgagnabólstrari gætirðu unnið á húsgagna- eða bólsturverkstæði, gjarnan í samstarfi við húsgagnasmiði og hönnuði.
Húsgagnabólstrari þarf að vera skapandi og hugmyndaríkur og geta unnið með höndunum við að teikna og sinna viðhaldi á húsgögnum. Unnið er með efni á borð við ull, bómull og leður og ýmis verkfæri svo sem nálar, skæri, hamar, saumavél og sérhæfðari rafmagns- og loftverkfæri.
Húsgagnabólstrun er í boði við Tækniskólann, fimm annir í skóla og starfsþjálfun þar sem fylgt er rafrænni ferilbók sem heldur utan um framvindu vinnustaðanámsins.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
