Heimspekingar glíma við grundvallarspurningar um lífið og tilveruna. Þau sem titla sig heimspekinga starfa oft við háskóla- eða rannsóknarstofnanir en einnig starfar margt heimspekimenntað fólk við kennslu í grunn- og framhaldsskólum, við blaðamennsku, eða ritstörf ýmiskonar. Mörg störf heimspekinga tengjast einnig sviðum á borð við hagfræði, stærðfræði, bókmenntafræði, lögfræði og sagnfræði.
Alls staðar þar sem heimspeki er stunduð eru gagnrýnin hugsun og öguð vinnubrögð afar mikilvægir eiginleikar hvort tveggja í námi og starfi. Heimspekingar þurfa að geta tekist á við erfiðar spurningar, til dæmis siðferðileg álitamál um rétt og rangt og geta séð fleiri en eina hlið á hverju máli. Þá er æskilegt að hafa áhuga á rökræðu og margs konar fræðikenningum.
Heimspeki til BA – prófs er í boði við Háskóla Íslands en þar er einnig hægt að stunda framhaldsnám í greininni.
Þá býður Háskólinn á Bifröst upp á svokallað HHS – nám en þar er fléttað saman heimspeki, hagfræði og stjórnmálafræði til BA – prófs.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
