Einkaþjálfarar leiðbeina við margskonar líkamsæfingar. Í starfinu felst að kenna og sýna rétta tækni við æfingar, fylgjast með og útskýra hvað best sé að gera til að ná árangri. Þá leiðbeina einkaþjálfarar og veita upplýsingar um rétt mataræði og þyngdarstjórnun.
Í starfi sem einkaþjálfari gætirðu unnið á líkamsræktarstöð og/eða við fjarþjálfun á netinu.
Einkaþjálfarar þurfa að eiga gott með mannleg samskipti, geta hlustað á óskir viðskiptavina auk þess sem skipulagshæfni er mikill kostur. Áhugi á heilsusamlegu líferni er nauðsynlegur og vilji til þess að leiðbeina öðrum. Einkaþjálfarar þurfa að vera í góðu líkamlegu ástandi enda getur starfið hvort tveggja reynt á úthald og styrk.
Margir einkaþjálfarar eru menntaðir íþróttafræðingar eða með annað nám og/eða reynslu á því sviði. Heilsuakademía Keilis hefur einnig boðið upp á sérstaka námsleið í einkaþjálfun.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
