Hlutverk bóksala er að miklu leyti að ýta undir lestaránægju og miðla þekkingu. Bóksalar upplýsa, gefa góð ráð og hvetja áhugasama lesendur til dáða hvort sem um er að ræða bækur ofarlega á vinsældalistum eða faldar minna þekktar perlur.
Í starfi sem bóksali gætirðu til dæmis unnið í bókaverslun, fornbókabúð, bókaforlagi og í tengslum við bókaklúbba eða netverslanir. Samhliða bóksölunni eru einnig oft í boði tengdar vörur líkt og landakort, ljósmyndir, minjagripir eða gjafavara.
Bóksalar þurfa að hafa mikinn áhuga á bókum og bókmenntum auk hæfileika í samskiptum við viðskiptavini. Þekking á ólíkum greinum bókmennta er einnig kostur, innlendum sem erlendum rithöfundum auk þess sem tungumálakunnátta og þekking á fyrirtækjarekstri getur komið að góðum notum.
Ekki er gerð krafa um sérstakt nám til að starfa við bóksölu en margskonar menntun getur komið að gagni.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
