Tannsmíði er grunnnám á háskólastigi. Megintilgangur námsins er að tryggja að nemendur séu að því loknu færir um að smíða gervigóma, lausa tannhluta, postulínsbrýr og tannplanta. Áhersla er lögð á að nota nútímaleg, árangursrík og viðurkennd úrræði við smíðina, ávallt með hagsmuni sjúklinga að leiðarljósi. Tannsmíði er löggilt heilbrigðisgrein.
Náminu lýkur með BS prófi. Námstími er þrjú ár.
Nám í tannsmíði er kennt við tannlæknadeild Háskóla Íslands.
Inntökuskilyrði eru stúdentspróf af bóknámsbraut frá framhaldsskóla eða sambærilegt nám.
Námið er lánshæft til framfærslu og skólagjalda hjá Menntasjóði námsmanna. Fag- og stéttarfélög veita oft styrki til náms. Fáðu frekari upplýsingar hjá þínu félagi.
Nám í tannsmíði er fræðilegt og verklegt og fer fram í staðnámi. Námið er einungis hægt að stunda sem aðalgrein.
Í desember í lok fyrstu annar er haldið samkeppnispróf.
Námið veitir rétt til að sækja um starfsréttindi til Landlæknisembættis og geta nemendur að því loknu starfað sem tannsmiðir.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
