Táknmálsfræði og táknmálstúlkun er nám á háskólastigi. Í náminu er leitast við að kenna nemendum færni í íslensku táknmáli og veita þeim þekkingu á menningarheimi heyrnarlausra. Nemendur fá þjálfun í málnotkun, málfræði táknmálsins og fræðslu um menningu og sögu heyrnarlausra.
Nám í táknmálsfræði og táknmálstúlkun hefur verið kennt innan Íslensku- og menningardeildar Hugvísindasviðs Háskóla Íslands.
Inntökuskilyrði eru stúdentspróf eða sambærilegt próf. Ekki er gerð krafa um kunnáttu í íslensku táknmáli við upphaf námsins.
Námið er lánshæft til framfærslu og skólagjalda hjá Menntasjóði námsmanna. Fræðslusjóðir stéttarfélaga veita oft styrki til náms. Fáðu frekari upplýsingar hjá þínu félagi.
Námið byggir á fyrirlestrum, samræðu og hópavinnu. Áhersla er lögð á þátttöku nemenda í tímum, sérstaklega þar sem fram fer þjálfun í málnotkun og túlkun.
Ýmist er kennt á íslensku eða íslensku táknmáli.
Eftir 180 eininga nám í táknmálsfræði (aðalfag) og táknmálstúlkun útskrifast nemendur sem táknmálstúlkar.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
