Skipstjórn er starfstengt nám á framhaldsskólastigi. Meginmarkmið námsins er að nemendur verði færir um að sigla flutninga-, farþega- og fiskiskipum. Í því felst að auka færni og þekkingu á siglingafræði, stjórnunaraðferðum, notkun siglingatækja ásamt reglum og öryggi er tengjast skipum og siglingum. Hugsanlegt er að fá færni sem aflað er á vinnumarkaði metna á móti verklegum greinum (raunfærnimat).
Skipstjórn er löggilt starf. Meðalnámstími er fjögur ár til fullra skipstjórnarréttinda.
Nám að fullum skipstjórnarréttindum hefur verið kennt í Tækniskólanum- skóla atvinnulífsins en stig A og B einnig við Menntaskólann á Ísafirði.
Umsækjendur þurfa að hafa lokið skyldunámi í samræmi við Aðalnámskrá grunnskóla, sjá nánar á heimasíðu skóla.
Námið hefur verið lánshæft til framfærsluláns og annarra lána hjá Menntasjóði námsmanna. Eins veita fag- og stéttarfélög oft styrki til náms. Fáðu frekari upplýsingar hjá þínu félagi.
Nám í skipstjórn skiptist í almennar bóklegar greinar og sérgreinar skipstjórnarinnar. Það er þrepaskipt og geta nemendur fengið réttindi að loknu hverju stig, frá A til D. Til að öðlast skipstjórnarréttindi þarf nemandi að hafa lokið réttindanámi, A, B, C eða D og 24 – 36 mánaða siglingatíma samkvæmt lögum um áhafnir íslenskra farþegaskipa og flutningaskipa og reglugerð um skipsstjórnar- og vélstjórnarréttindi á fiskiskipum, varðskipum og öðrum skipum.
Námið er hægt að taka að mestu í dreifnámi.
Námið ásamt skilyrðum um siglingatíma, starfsþjálfun, vottorði um sjón og heyrn og öryggisfræðslu veitir skipstjórnarréttindi á fiskiskip, flutninga- og farþegaskip og önnur skip.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
