Rafeindavirkjun er starfstengt nám á framhaldsskólastigi. Í náminu felst að auka þekkingu og færni við uppsetningu og viðgerðir boðskiptakerfa og rafeindatækja, notenda- og tölvubúnaðar sem og rafeindabúnaðar farartækja. Hugsanlegt er að fá færni sem aflað er á vinnumarkaði metna.
Rafeindavirkjun er löggilt iðngrein. Meðalnámstími er fjögur ár að meðtalinni starfsþjálfun.
Rafeindavirkjun hefur verið kennd við Tækniskólann – skóla atvinnulífsins og Verkmenntaskólann á Akureyri.
Grunnnám rafiðna hefur verið kennt í Fjölbrautaskólanum í Breiðholti, Fjölbrautaskóla Norðurlands vestra, Fjölbrautarskóla Suðurlands, Fjölbrautaskóla Suðurnesja, Fjölbrautaskóla Vesturlands, Framhaldsskólanum í Vestmannaeyjum, Menntaskólanum á Ísafirði og Verkmenntaskóla Austurlands.
Umsækjendur þurfa að hafa lokið skyldunámi í samræmi við Aðalnámskrá grunnskóla, sjá nánar á heimasíðu skóla.
Námið hefur verið lánshæft hjá Menntasjóði námsmanna. Fag- og stéttarfélög veita oft styrki til náms. Fáðu frekari upplýsingar hjá þínu félagi.
Rafeindavirkjun skiptist í almennar bóklegar greinar, sérgreinar og starfsþjálfun. Athugaðu hvort námið eða hluti þess geti verið kennt í fjarnámi.
Fyrstu tvö árin er farið í sameiginlegt grunnnám rafiðngreina en eftir það sérhæfa nemendur sig í rafeindavirkjun. Nemandi gerir námssamning við iðnmeistara í faginu þar sem starfsþjálfunin fer fram.
Að námi og starfsþjálfun lokinni er möguleiki á að fara í sveinspróf sem veitir rétt til starfa í greininni ásamt inngöngu í nám til iðnmeistaraprófs eða rafiðnfræði. Einnig er hægt að ljúka viðbótarnámi til stúdentsprófs.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
