Jarðfræði er nám á háskólastigi og tengist þekkingu á jarðefnum, uppbyggingu og hreyfingum jarðskorpunnar og hagnýtum þáttum þeim tengdum svo sem nýtingu orkuauðlinda, málmvinnslu og nýtingu fiskistofna.
Í náminu er lögð áhersla á skilning ákveðinna grunnhugtaka og traustan fræðilegan grunn í greinum á borð við eðlisfræði, efnafræði og stærðfræði.
Nám í jarðfræði hefur verið kennt innan Jarðvísindadeildar Háskóla Íslands. Í boði er þriggja ára grunnnám til BS gráðu og sambærilegt nám í jarðeðlisfræði. Um tvö kjörsvið hefur verið að ræða á meistarastigi; jarðfræði og endurnýjanleg orka – jarðhitavísindi auk náms til doktorsprófs.
Inntökuskilyrði eru stúdentspróf eða sambærilegt nám en umsækjendur þurfa einnig að hafa lokið ákveðnum einingafjölda í stærðfræði og raungreinum.
Námið er lánshæft til framfærslu og skólagjalda hjá Menntasjóði námsmanna. Fræðslusjóðir stéttarfélaga veita oft styrki til náms. Fáðu frekari upplýsingar hjá þínu félagi.
Nám í jarðfræði samanstendur aðallega af skyldunámskeiðum auk valgreina á þriðja ári. Meðal viðfangsefna eru eldfjallafræði, steinda- og bergfræði, jarðefnafræði og jarðlagafræði.
Fræðileg og hagnýt þekking á jarðvísindum getur víða komið sér vel í atvinnulífinu, svo sem í tengslum við leit að neysluvatni, málmum eða byggingarefnum, nýtingu jarðhita, mannvirkjagerð eða eftirlit með umbrotum í jarðskorpunni.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
