Fatahönnun er nám á háskólastigi. Í náminu er lögð áhersla á að nemendur tileinki sér hugmyndafræði hönnunar og skapandi greina auk þess að efla færni og þekkingu á handverki við fatahönnun. Farið er í sögu hönnunar, efnisgerð, teikningu, gerð mismunandi klæðnaðs og heildarferli fatahönnunar, frá hugmynd til framleiðslu.
Náminu lýkur með BA prófi. Námstími er þrjú ár.
Nám í fatahönnun hefur verið kennt innan hönnunar- og arkitektúrdeildar Listaháskóla Íslands.
Inntökuskilyrði eru stúdentspróf úr framhaldsskóla eða sambærilegt nám. Umsækjendur skulu hafa hlotið menntun eða reynslu í listum eða hönnun og geti sýnt fram á færni og þekkingu með því að senda inn sýnishorn af verkum í möppu ásamt umsókn.
Námið er lánshæft til framfærslu og skólagjalda hjá Menntasjóði námsmanna.
Fræðslusjóðir stéttarfélaga veita oft styrki til náms. Fáðu frekari upplýsingar hjá þínu félagi.
Nám í fatahönnun er fræðilegt og verklegt. Ýmist er farið í skyldufög og valfög öll þrjú árin. Námið er kennt staðbundið.
Eftir námið er hægt að starfa sem fatahönnuður. Eins veitir BA próf möguleika á framhaldsnámi á háskólastigi.
Náms- og starfsráðgjafar hjálpa til við upplýsingaleit og aðstoða að finna leiðir til að bæta færni í námi og efla í starfi.
